Միկրոբային պատերազմ ստամոքսում. Helicobacter Pylori

Մարդկանց մոտ 80 տոկոսից ավելի դեպքերում օրգանիզմում հայտնաբերվում է Helicobacter Pylori մանրէն. սա գաստրոէնտերոլոգների կողմից ներկայացված վերջին տվյալներն են:

Ստամոքսում Helicobacter Pylori ներկայությունն առաջացնում է քրոնիկ անտրալ ատրոպիկ գաստրիտ, քրոնիկ էրոզիվ գաստրոդուոդենիտ, ստամոքսի և 12-մատնյա աղու խոցային հիվանդություն:

Ամենավտանգավորն այն է, որ այս մանրէի առկայությունն օրգանիզմում կարող է նաև ստամոքսի քաղցկեղի պատճառ դառնալ:

Հելիկոբակտերը հեշտությամբ փոխանցվում է անգամ առօրյա կենցաղային շփումների ժամանակ: Այդ պատճառով հաճախ վարակվում է ամբողջ ընտանիքը:

Ախտանշանները

Օրգանիզմում հելիկոբակտերի ներկայության արտահայտությունները բազմազան են՝ թեթև ընթացող դիսպեպսիայից /սրտխառնոց, ծանրություն ստամոքսում` ուտելուց հետո/ մինչև արտահատված ցավային ախտանշան:

Հետազոտությունները

Անհրաժեշտ է մանրէի առկայությունը ստուգել ստամոքսի հետ կապված ախտանշանների, ստամոքսի և 12-մատնյա աղու խոցային հիվանդությունների ժամանակ և ստամոքսի ուռուցքի ժառանգական ռիսկեր ունեցողների մոտ:

Հետազոտությունն իրականացվում է գաստրոսկոպի միջոցով /գաստրոսկոպիա, էզոֆագոգաստրոդուոդենոսկոպիա/, որն իր ճշգրտությամբ շատ հուսալի է` ախտահարման աստիճանի որոշումով: Հետազոտությունը արդյունավետ բուժում կազմակերպելու գրավական է և համարվում է «ոսկե ստանդարտ»:

Բուժումը

Յուրաքանչյուր բուժառուի համար ընտրվում է անհատական բուժման սխեմա, որը, ստամոքսի թթվության պաշարիչներից զատ, ներառում է նաև մանրէասպան հակաբոտիկներ` բուժման առաջին կուրսի վերջում ապահովելու 90-95 տոկոս դրանց ոչնչացում:

Բուժման սխեման ընտրելիս պետք է առաջնորդվել նաև դեղորայքի նկատմամբ բուժառուի անհատական զգայունությամբ՝ խուսափելու հնարավոր բարդություններից:

Հելիկոբակտերի բուժումն իրականացվում է ամբուլատոր պայմաններում:

Հարցեր, պատասխաններ, մեկնաբանություններ